Ég hef verið að sjá hér og þar um netið pælingar um ákveðin hlut varðandi þetta Fischer mál. Þannig er mál með vexti að seinasta sumar tók forsetinn okkar ákveðna ákvörðun. Hann festi embættið í sessi sem raunverulegan þátt af löggjafarvaldinu þegar hann neitaði lögum um undirskrift.

Allt gott og vel með það. En í kringum þetta mátti svo skilja á alveg ofsalega mörgum sérfræðingum að það væri bara fullkomlega eðlilegt að búast við því að forseti gerði þetta og að menn gætu langt í frá litið á það sem svo að frumvarp frá alþingi yrði að lögum sjálfkrafa. Fréttablaðið var öðrum fjölmiðlum duglegri í að ýta þessari skoðun að okkur. En nú ber svo við að alþingi samþykkir lög um ríkisborgararétt fyrir herra Fischer þrátt fyrir að andstaðan við það í þjóðfélaginu sé ef eitthvað er meiri en í umræddu máli í sumar. Samt sem áður dettur engum, og þá síst af öllum fjölmiðlamönnum í hug að forseti synji þessu máli samþykktar. Djúp gjá á milli þings og þjóðar hvað?

Það er svo auðvitað allt annað mál að 'málskotsrétturinn' á að vera hjá þjóðinni sjálfri, ekki einum manni.

Jæja þá.

Páskarnir voru fínir, ég stóð við helminginn af planinu fyrir páskana en þar sem að það tók mikið á andlega og líkamlega að ryðja herbergið og átsparturinn varð heldur meiri en oft áður þá tókst mér ekki að standa við það að fara til natta eða skrifa níðgreinar. Nota næstu daga í það.

Bobby Fischer málið snerist frá því að vera leiðinlegasta mál ársins yfir í fyndnasta mál ársins með einni beinni útsendingu. Páll Magnússon hlýtur svo að fá einhver verðlaun fyrir aulalegustu afsakanir sem heyrst hafa í lengri tíma.
Þessi atburðarrás breytir þau auðvitað engu um málið sjálft, það verður erfitt að verja þessa ríkisborgararéttindaveitingu þegar fram í gagnvart almenningi en ég sé ekki að nokkur einasti þingmaður geti mikið vælt yfir þeim í nánustu framtíð, nema jú Birkir og Dagný framsóknarfólk, þau stóðu við sitt.

En þótt að manni þyki þetta leiðindamál í sjálfu sér og skilji ekkert í íslenskum stjórnmálamönnum sem mynduðu þverpólitíska samstöðu(margir skáknördar á þingi) þá er ekki þar með sagt að maður taki undir málflutning t.d. Washington Post og það er langt í frá að maður sé sáttur við leiðindin í Wiesenthal stofnuninni. Þar á bæ nota menn tækifærið og rifja það upp að við íslendingar hafi 'skotið skjólshúsi' yfir 'stríðsglæpamaninn' Eðvald Hinriksson í 40 ár. Sú staðreynd að það hefur aldrei tekist að sýna fram á nokkurn vott af sönnunum fyrir meintum stríðsglæpum Eðvalds og það að hann flutti hingað af eigin sjálfsdáðum og kom sér upp fjölskyldu truflar Wiesanthal menn lítið.

En svona er þetta víst.

Þetta er bara hin fínasta páskahugleiðing.

Össur Skarphéðinsson heldur úti þessar líka sérdeilis prýðilegu heimasíðu.

Þar er að finna m.a. pælingar Össuruar í amstri hversdagsins og hugleiðingar um pólitík og íslenskt samfélag. Í gær skrifar hann m.a. um Rúv og fjölmiðla almennt og hefur þetta að segja um það sem að ég verð að gera ráð fyrir að séu miðlar 365 samsteypunar:

Ægivald Baugs stingur marga í augu. Við stjórnmálamenn gætum vafalítið bent á dæmi um það hvernig vild Baugs virðist stundum birtast í sérstakri umhyggju fyrir þeim stjórnmálamönnum og konum sem Baugur hefur velþóknun á. Í atvinnulífinu kvarta menn hástöfum undan því að Baugsmiðlarnir hygli fyrirtækjum sem þeim tengjast með fréttum og umfjöllun sem þeir eiga í eða hafa tengsl við.

Svo mörg voru þau orð.

Nei hæ

Þetta er svolítið stopult hjá manni þessa dagana, hef af einhverjum ástæðum litla nennu til að hanga á netinu upp á síðkastið enda alveg nóg að gera þannig séð. Er líka búin að vera með leiðindahálsbólgu í næstum tvær vikur og þegar það bættist svo við heiftarleg ennisholubólga þá fór ég og fékk sýklalyf og læti. Sýklalyfin takast þrisvar á dag og lætin takast á klukkutímafresti.

Þessi ennisholubólga er kúl. Það er svona eins og maður sé með blýkúlu á bakvið annað augað, frekar óþægilegt svona venjulega en þegar ég beygi mig fram er eins og að kúlan sé að reyna að þrýsta auganu út. Skemmtilegur verkur það!

Var í bústað með fjölskyldunni um helgina, systir pabba og hennar fjölskylda var með í för. Frábær ferð, keppnis afslöppun.

Svo er það spurningin hvað maður gerir um páskana? Er með svona smá plan:

Ryðja herbergið
Fara til Natta og færa draslið af gamla lappanum yfir á nýja
Skrifa níðgreinar fyrir sus.is og Voga
Éta

Gott plan held ég.

Ég nenni ekki að röfla um neitt í bili, er of hress eftir helgina.

Mikið rosalega er umræðan um ráðningu nýs fréttastjóra hjá útvarpinu leiðinleg. Þessi gaur er örugglega fínn en þetta var furðuleg ráðning og kom á fáránlegum tíma. En viðbrögðin við henni eru líka fáránleg. Það er eins og himinn og jörð séu að farast.

Ég hef það annars fínt, nóg að gera. Týr var með kynningu í MK í vikunni og við fylgdum henni eftir með Idol partýi í gær sem að heppnaðist hreint út sagt frábærlega. Flott stemning og fullt af fólki og slatti af nýskráningum. Hörku fjör. Sjálfur var ég edrú sem að kom mörgum á óvart enda frír bjór í boði en ég skemmti mér engu að síður frábærlega. Svo mikið að ég er að hugsa um að endurtaka svona edrúmennsku oft á næstunni. Gaman að því.

Mig langar að byrja þennan póst á því að óska þeim til hamingju sem að drulluðu yfir Eið Smára og fullyrtu það að hann hefði gerst sekur um glæp.

-----------

Skemmtileg þessi þing hjá stjórnmálaflokkunum núna, eða landsfundir eða landráðafundir eða hvað þetta heitir. Framsókn heldur þing þar sem að nákvæmlega ekkert gerist en samt er allt brjálað í fréttunum og menn túlka hinar ýmsu ályktanir hingað og þangað.
Frjálslyndir halda Landráðsfund(frábært nafn) þar sem að slagur er um varaformannsætið en að öðru leyti virðist ekkert gerast. Reyndar var þetta alveg nóg þannig séð, Gunnar og hans fólk hundfúlt með niðurstöðuna og aðferðir Magnús Kjaftfors og félaga í kosningabaráttunni og hann var með stórar yfirlýsingar í Silfri Egils áðan.
En eitt finnst mér magnað, það er talað um að Magnús hafi fengið 70% atkvæða á þessum fundi en þegar maður skoðar tölurnar þá fékk hann atkvæði 48% landsfundarfulltrúa eftir því sem að ég sé. Allavega benda þessar tölur til þess:
niðurstöður talningar:

192 skráðir landsþingsfulltrúar.
182 neyttu atkvæðisréttar með því að sækja kjörseðil.
93 kusu Magnús Þór Hafsteinsson, eða 48% landsþingsfulltrúa.
41 kusu Gunnar Örn Örlygsson, eða 21% landsþingsfulltrúa.
7 kusu Margréti Sverrisdóttur, sem ekki gaf kost á sér.
1 seðill var auður.

Það verður fróðlegt að fylgjast með því hvað gerist hjá Frjálslyndum núna, Gunnar hefur verið lang frambærilegastur þeirra hingað til að mínu mati.

-------------

Í sunnudagsmogganum er fjallað um Fagnaðarfund á leikskólanum Fögrubrekku en það er einmitt þar sem að ég vinn. Allir að skoða!