Er búin að vera að lesa yfir dagbækur Baggalúts, hef gert það áður. Alltaf alltaf alltaf skelli ég uppúr þegar ég les þessa færslu Enters:

Eru það rökrétt örlög þessa glaðlynda krabbadýrs, rækjunnar, að enda sem mjólkurafurð smurð á brauðsneið?

Stundum hræðir heimurinn mig.

Liverpool eru evrópumeistarar. Flott hjá þeim.
Núna er kórinn um að það sé bara ósanngjarnt að þeir fái ekki að verja titilinn að ári orðin þreytandi hávær.

Eitt langar mig að benda mönnum á. Grikkir eru evrópumeistarar landsliða, þeir þurfa að taka þátt í undankeppni fyrir næsta EM og sá möguleiki er fyrir hendi að þeir fái ekki að 'verja' sinn titil í lokakeppni. Brasilía er heimsmeistari og skv. nýjum reglum FIFA þurfa þeir líka að ganga í gegnum undankeppni og gætu alveg lent í því að fá ekki að 'verja' sinn titil í lokakeppni.

Af hverju ætti að hleypa Liverpool inn í keppni sem á að vera á milli þeirra liða sem stóðu sig best í sínum deildum? Og af hverju á að breyta settum reglum eftirá?

Frank Rich heitir maður sem er pistlahöfundur hjá NY Times.

Hann skrifar fína grein um þetta Newsweek mál og hefur m.a. þetta að segja:

"Let's stipulate flatly that Newsweek made a serious error. For the sake of argument, let's even posit that the many other similar accounts of Koran desecration (with and without toilets) by American interrogators over the past two years are fantasy - even though they've been given credence by the International Committee of the Red Cross and have turned up repeatedly in legal depositions by torture victims and in newspapers as various as The Denver Post and The Financial Times. Let's also ignore the May 1 New York Times report that a former American interrogator at Guantánamo has corroborated a detainee's account of guards tossing Korans into a pile and stepping on them, thereby prompting a hunger strike. Why don't we just go all the way and erase those photographs of female guards sexually humiliating Muslims (among other heinous crimes) at Abu Ghraib´

Even with all that evidence off the table, there is still an overwhelming record, much of it in government documents, that American interrogators have abused Muslim detainees with methods specifically chosen to hit their religious hot buttons"

Það er engan vegin hægt að kenna Newsweek um þetta.

Ég reyndar hvet sem flesta til að fá sér netáskrift hjá Times, kostar ekkert og oft marg sniðugt þarna.

Ég á svolítið erfitt með að átta mig á því hvernig vestrænir blaða- og stjórnmálamenn fara að því að ná þessum ótrúlegu hæðum sjálfhverfingar.

Newsweek birtir frétt byggða á röngum heimildum um það að hugsanlega hafi einhverjir fangaverðir í Guantanamo-fangabúðunum 'vanvirt' Kóranin, með því að henda honum ofan í klósett og fleira. Kannski er ég bara skrýtinn en ég hef alltaf staðið í þeirra trú að Kóranin og Biflían væru meira en bara pappírinn sem ritin er skrifuð á, það væri hugmyndin á bakvið þau sem skipti máli. En allavega.

Nú hluti af því sem að vestrænir blaðamenn kalla 'múslimaheiminn' reiðist þessu. Stór mótmæli gegn vestræna hluta heimsins eiga sér stað og í Afganistan gerir lögreglan sér lítið fyrir og drepur 15 mótmælendur.

Newsweek dregur fréttina til baka og viðurkennir að kannski hugsanlega gæti verið að heimildin hafi ekki verið alveg nógu 100% pottþétt. Og hvað gerist þá? Setjast menn niður og íhuga það af hverju staðan sé svona í þessum hluta heimsins? Að loftið sé það þrungið spennu gagnvart vesturveldunum að svona smámunir komi af stað ofbeldi og drápum?

Ónei! Menn tala um að nú þurfi vestrænir fjölmiðlar að gangast undir allsherjar naflaskoðun þar sem engin kuskögn skal látin óhreyfð! Það á sko aldeilis að taka þessa fjölmiðla í gegn!

Fíflaskapur á hæsta stigi.

Það er ekki oft sem ég les texta á netinu sem mér finnst bæði snilldarlega vel skrifaður og jafnframt hitta naglann á höfuðið. En það gerðist svo sannarlega nú áðan.

Tekið af baggalúti.is:

Kína

~ Enter 17/5

Hvað er þetta forsetapuntstrá okkar að paufast til Kína ásamt stífbónuðum erkikanónum íslensks viðskiptalífs, púkkandi upp á þessa drambfylltu risaeðlu, sem sennilega er sú eina sem att getur kappi við Bandaríkin í fokkmerkjasendingum til annarra þjóða?

Hvurn þremilinn höfum við að gera með aukin samskipti við þessa sjálfumglöðu roðamaura? Er ekki bara hægt að auka í staðinn samskiptin við Lúxembúrg — eða Guam?

Nei. Vitanlega ekki. Það þarf auðvitað að fljúga öllum pottum, pönnum og kastarollum íslensks viðskiptalífs á einhvern fornfrægan, útvatnaðan hrísgrjónaakur í Asíu til að mynda þar einhver kagfruggin viðskiptasambönd — gera bísniss. Taka í spaðann á nokkrum rauðgylltum tyllikommum og biðja þá endilega að hætta að drepa óvini ríkisins um hábjartan dag. Gegn því auðvitað að við kaupum af þeim fleiri, hva, jogginggalla? kínaskó? eyrnapinna? Hvað veit ég?

Andskotann ætli Kínastjórn taki mark á einhverri frosetalufsu frá Íslandi, einhverjum valdalausum gullinkambi sem tístir upp þrautleiðinlegri land­kynningartuggu um mannréttindi, slor og ál. Og af hverju ættu þeir líka að eyða tíma í að hýsa, næra og ómaka sig í samræður við 1. herfylki íslensks atvinnulífs?

Er það af því þá bráðvantar lýsi eða máski lopapeysur? Þykja þeim íslenskar jarð­skjálfta­rannsóknir svona ferlega kúl — eða finnst þeim Óli og Björgólfur einfaldlega bara svona sætir og skemmtilegir?

Varla. Þetta eru samviskurotnir litlir karlfauskar sem halda sig geta keypt vináttu og syndaaflausn í krafti markaðsflæmis og viðskiptagylliboða — og við eigum einfaldlega ekki að láta þá komast upp með það.

Ég vil bara ekki hafa það að þessum falskímandi undirokunarrauðrófum sé boðið af íslenskum stjórnvöldum í líttspjallaða jómfrúarsæng íslenskrar markaðssóknar og fái þar að þukla og þreifa að vild með blóðugum lúkunum.

Drullist þið aftur heim.

Á seinustu vikum hafa fjölmargir prestar skeiðað fram fyrir opna skjöldu og tjáð sig um einhverja þá mestu hættu sem íslensku samfélagi, gott ef ekki heiminum öllum þessa stundina. Allavega 4 þjóðkirkjuprestar auk biskupsins sjálfs hafa varað við því að hér í samfélaginu séu uppi raddir um að kristinfræðsla í skólum sé slæm og hana beri að afnema, biskupinn sjálfur gengur svo langt að kalla þetta innrætingu(ef að einhver getur rökstutt það að kristni sé ekki innræting þá fær hinn sami 500 kall og knús).

Fleiri óvígðir og þar með sjálfskipaðir varðmenn kristninnar hér á landi hafa tekið undir þetta, þar á meðal Sigmundur Erni og Jón Gnarr.

Það sem allir þessir menn eiga sameiginlegt er að beita einhverju lúalegasta áróðursbragði sem til er sínum málstað til stuðnings. "Endurtaktu lygina nógu oft og fólk fer að trúa þér". Ekki minni manni en Göbbels, áróðursmálaráðherra Hitlers hefur verið eignuð þessi setning og nú virðist hún eiga við fulltrúa þjóðkirjunnar á Íslandi líka.

Kveikjan að þessari hneykslun trúmanna er saklaus Kastljósþáttur sem Sigurður Hólm Gunnarsson fór í fyrir hönd Siðmenntar og fyrirlestrar sem hann hafði haldið skömmu áður.

Það sem er svo magnað við þetta er það að hvorki í þessum Kastljósþætti né fyrirlestrunum í kringum hann krafðist Sigurður þess að kristinfræðslukennslu yrði hætt hér á landi. Og þess hefur í raun engin krafist eftir minni bestu vitund. Það sem hefur verið rætt er það að kristnu TRÚBOÐI verði hætt í grunn- og reyndar leikskólum hér á landi. Fræðsla um kristna trú er eðlilegur hluti af samfélagsfræðikennslu í landi þar sem kristnin hefur haft jafn mikil ítök í og hér. Og það skal engin efast um það að trúboð fari fram hér í einhverju mæli. Fram hefur komið í fjölmiðlum að í sumum skólum tíðkist morgunbænir.

Þetta hafa riddarar kristninar látið fara framhjá sér. Þeir hafa líka hunsað allar þær blaðagreinar og leiðréttingar eftir öðrum leiðum sem komið hafa fram. Af þeirri einni ástæðu auðvitað að þeir geta ekki með góðu móti komið 'sínu liði' upp á móti þeim sem vilja 'bara' afnema augljóst trúboð.

Þetta er til skammar.

Ný grein eftir sjálfan mig á sus.is

Held að hún sé ágætt, er reyndar búin að vera í voða litlu greinastuði upp á síðkastið.

Ólafur Ragnar Grímsson, forseti Íslands, er í heimsókn í Kína eins og margir hafa kannski tekið eftir. Með honum í för eru m.a. fjölmargir fulltrúar íslenska viðskipta- og iðnaðargeirans enda er stór hluti ferðarinnar viðskiptalegs eðlis og á m.a. að skrifa undir einhverskonar fríverslunarsamning á milli þjóðanna.

Ólafur segist ætla að nota tækifærið og spjalla um mannréttindi við leiðtoga Kínverja. Eins nauðsynlegt og það er þá efast ég einhvern vegin um að þetta verði hörð eða áhrifarík gagnrýni. Seinast þegar farið var í svipaða ferð með forseta Íslands sem var þá Vigdís Finnbogadóttir kom frá henni í umræðum á opnum blaðamannafundi þegar talað var um þetta sama málefni þessi gullmoli:

"Mannréttindi eru auðvitað afstætt hugtak".

Þó að ég efist nú um að ÓRG falli í sömu gildru þá efast ég um að ástandið hjá almenningi í Kína eigi eftir að batna mikið eftir heimsókn hans.

Og hananú!

Ágætt að fá auka þingmann svona næstum ókeypis! Og einn af þeim skárri meira að segja, allavega málefnalega séð.

Fyndið samt þetta með samskiptaörðugleikana sem að Gunnar notar sem ástæðu fyrir þessu. Magnús Þór Hafsteinsson segist ekki kannast við neina samskiptaörðugleika, Gunnar hafi bara getað komið að máli við hann hvenær sem hann vildi og hann hefði bara fengið 1 af þessum e-mailum sem að Gunnar segist hafa sent.

Þegar menn sem vinna á sama stað daglega, stundum 10 klst. á dag 7 daga vikunnar talast ekki við í marga mánuði og þurfa að senda e-mail til að koma á fundum, og jafnvel það er ekki nóg, þá er eitthvað að! Sama hvað Magnús Þór Hafsteinsson segir!

Sannleikurinn og heiðarleiki hafa reyndar ekki verið mikið að flækjast fyrir Magnúsi hingað til.

Var aðeins að hreinsa til í linkunum, henti nokkrum dauðum út en Hulda og Ragga fá smá gálgafrest. Þeir sem vilja fá link á sig endilega láta vita, kunningsskapur ekki nauðsynlegur, bara skemmtilegheit.

23