Lykilorðið í umræðu seinustu daga um Hér og Nú og Bubba er hræsni.

Á nánast hverjum degi í marga mánuði hefur DV slegið upp forsíðum og birt fréttir sem eru á sama kaliberi og það sem H&N hafa verið að skrifa um Bubba, jafnvel verra. En þar hefur yfirleitt verið um að ræða annaðhvort það sem við, for the sake of the argument, skulum kalla 'venjulegt' fólk eða þá fólk sem hefur átt eða á við einhverja erfiðleika að stríða. Þá auðvitað skiptir þetta ekki meira máli en það að kollegar H&N manna hjá 365 Fjölmiðlum hafa í mesta lagi lyft brúnum eða hrist höfuðið og almenningur hefur sýnt frekar lítil viðbrögð.

Nú ber svo við að fjallað er um opinbera persónu. Ég skal reyndar alveg viðurkenna það að mér finnst umfjöllunin um Bubba og Brynju frekar subbuleg blaðamennska(alltaf gaman að slá um sig með nýjustu buzz-orðunum) og þetta er ekki eitthvað sem ég sæki í. En. Af hverju er það fyrst núna sem aðrir blaðamenn mótmæla svona blaðamennsku af einhverju viti? Af hverju er fyrst farið að fjalla um svona mál í fleiri klukkutíma á dag á rúmlega annari hverri útvarpsstöð?

Mér finnst þetta mál fyrst og síðast bera vott um sjálfhverjuna sem stór hluti íslenskra fjölmiðlamanna þjáist af.

Stefán Pálsson er reyndar með skemmtilegar hugleiðingar um þetta, hann kallar þetta sjálfbæra fréttamennsku.

Hlalllló

Er búin að vera norður í Aðaldal frá því á fimmtudag, var að veiða á silungasvæðinu í Laxá á föstudag og laugardag með pabba og einum til viðbótar. Það eru fáir staðir á landinu þar sem ég finn mig betur en einmitt þarna. Veiðin hefði svosem mátt vera meiri en það var svosem nóg af tökum, meirihlutinn voru bara litlir tittir(lots of tits), þeir stærstu náðu kannski pundinu, en svo fengum við um 12 sem við hirtum. Mjög góð ferð.

Það er svona alvöru veiðikofi þarna. Gamall vegavinnuskúr sem að pabbi byggði ásamt öðrum þegar hann vann hjá Vegagerðinni í gamla daga, þá var hann í brúarsmíði á sumrin og svona skúragerð á veturna. Í kofanum er ekkert rafmagn en það er gas sem eldavél og einn hitari ganga fyrir, þótt að hitarinn hafi reyndar ekkert verið notaður. Svo er eitt lítið gasljós. Það hefur alltaf verið rennandi vatn en núna eru komnir einhverjir mjólkurróbótar(MilkBot?) á bæinn fyrir ofan og þeir taka allt vatnið. Þannig að við höfðum með okkur vatn á stórum brúsum og svo var sótt vatn í fötur niður í á ef að maður þurfti að ganga örna sinna.

Með merkilegri upplifunum sem ég varð fyrir þarna var þegar ég heyrði kind hósta í fyrsta skipti. Ég hafði bara aldrei einu sinni velt því fyrir mér að þær gerðu þetta yfirhöfuð. Maður er umkringdur dýralífi þarna, kindur, hestar og kýr af bænum sem liggur beint fyrir ofan og svo ótrúlega fjölbreytt og mikið fuglalíf.

------------------

Hvenær ætla menn að fara að einkavæða Ríkiskirkjurnar?

Óli Gneisti er ósáttur við tilvitnunina mína í Sverri Jakobsson hér fyrir neðan. Ég verð eiginlega bara að taka undir gagnrýni hans, setningin svona ein og sér lýsir því engan vegin við hvað Sverrir átti. Það sem sem ég skrifa svo við tilvitnunina bætir svo ekki úr skák og er líklega það sem fer mest fyrir brjóstið á Óla, án þess að ég geti svosem fullyrt um það.

Hér er grein Sverris í heild, ágætis grein og ég get í sjálfu sér tekið undir margt sem í henni stendur, en alls ekki allt.

Ég hef mér svosem engar málsbætur aðrar en þær að ég skrifaði þetta um miðja nótt eftir að hafa setið við bjórdrykkju með félögum mínum í lengri tíma og náði engan vegin samhengi, hvorki í því sem ég skrifaði hér eða því sem ég las annarstaðar.

Í mogganum í dag lýsir Árni Þór Vigfússon sjónvarpstjóri nýju stöðvarinnar Sirkus Kvöldþætti hennar sem 'fréttaskýringarþætti með tennur'. Sem boðar gott. Guðmundur Steingrímsson verður einn af stjórnendunum sem er jákvætt.

Svo segir Árni að þátturinn verði soldið eins og 'Daily Show' með Jon Stewart. Það ruglar mig svolítið þar sem sá þáttur er ekki fréttaskýringaþáttur heldur eru allar fréttir þar uppspuni(eða flest allar). Þetta er grínþáttur sem reyndar beitir stundum ádeilugríni gegn pólitíkusum. Finnst einhvern vegin að ef að menn ætla að fara að líkja þáttum við eitthvað þá verði menn að vita um hvað þeir eru að tala.

,, Rétturinn til að beita ofbeldi er líklega mikilvægustu forréttindi nútímans."æ

-Sverrir Jakobsson VG- hluti af viðbrögðum hans við árásum meintra umhverfissinna á ráðstefnu forsjármanna áliðnaðar.

Svolítið fyndið að fylgjast með því hvernig þeir sem skvettu skyri á álráðstefnunni um daginn og fylgismenn þeirra verja sig núna.

Þetta var ekki málning þannig að þetta var ekki ofbeldi. Og af því að þetta var ekki ofbeldi þá var þetta bara ekkert stórmál.

Ég bara spyr mig hvort að fólk haldi í alvörunni að svona aðgerðir séu til þess fallnar að fá fjöldann með sér í lið, sem hlýtur að vera stærsta vonin til þess að hafa áhrif.

Merkilegt líka að þau sem er búnir að vera sem mest í fjölmiðlum undanfarið að kynna 'friðsamlegu' mótmælabúðirnar sem eiga að vera uppi á Kárahnjúkum í sumar séu þau sömu og voru sett í gæsluvarðhald vegna skyrsslettnanna.

Evrópusambandselítan og fylgismenn hennar virðist vera búin að komast að því að neitun íbúa Frakklands og Hollands við sameiginlegri stjórnarskrá tengist öllu öðru en stjórnarskránni sjálfri, eða hugmyndinni um hana. Nei-ið var gegn Chirac, inngöngu Tyrkja í ESB, Kapítalisma(hvernig menn fá það út skil ég ekki) og bara í raun flestu öðru en stjórnarskránni sjálfri. Merkilegur andskoti.

Eitt en stjórnmálatengt, Guðjón Arnar Kristjánsson, formaður Frjálslynda Flokksins, virðist mikið í mun um að festa sig og flokkinn í sessi sem hirðfífl íslenskra stjórnmála.

Einn daginn lætur hann hafa það eftir sér að komist ríkisendurskoðun að því að Halldór Ásgrímsson hafi verið óhæfur í sölu ríkisbankanna þá þurfi hann að segja af sér. Sama dag, eftir að ríkisendurskoðun hefur tilkynnt að hún telji hann ekki hafa verið óhæfan er þessi könnun hennar orðin ómerkilegt plagg sem þurfi að 'skýra betur' og skiptir í raun engu máli. Magnað.

Hef annars lítið að segja almennt þessa dagana, sumarið hefur oft þessi áhrif á mann, allur krafturinn fer í að njóta veðursins og að skemmta sér.

Í dag vísaði Héraðsdómur í Reykjavík frá máli Fjölskyldu Halldórs Kiljans Laxness á hendur Hannesi Hólmsteini Gissurarsyni vegna þess að stefnan var svo illa og vitlaust sett fram að það var ekki hægt að taka málið fyrir efnislega.

Ég veit svosem ekki hvað maður þarf að gera nákvæmlega grein fyrir sínum málum en í svona máli þá myndi ég halda að það væri töluvert mikið.

Viðbrögð Guðnýjar Halldórsdóttur á Talstöðinni í dag voru nokkuð sniðugt. Þar hélt hún því fram að þetta þýddi að hver sem er gæti bara stolið texta frá einhverjum og skrifað um hann ævisögu, án þess að spyrja neinn um leyfi. Hún gæti t.d. bara tekið helling af texta eftir Einar Kárason í bók og sagt að það væri ævisagan hans. Hún ætti reyndar eftir að tala betur við höfundarréttarlögfræðinga um þetta. Þau Hallgrímur Thorsteinson og Helga Vala í síðdegisþætti Talstöðvarinnar voru greinilega á þeirri skoðun að þetta væri algjör réttarhneyksli og náðu því ekki hvernig nokkrum manni gæti dottið annað í hug en að Hannes sé svo sekur að svona smáatriði eins og að málið sé sett fram almennilega eigi að skipta máli.

Það sem Guðný virðist ekki alveg skilja, eða kannski bara ekki vilja skilja, er að það var engin efnisleg afstaða tekin til málsins. Dómarinn gæti þess vegna verið alveg sammála stefnendum. Það að koma fram í fjölmiðlum með svona yfirlýsingar er fáránlegt en segir að mínu mati reyndar allt um þessa málshöfðun.

Tíhíhíhí.

Hef voða voða lítið að segja. Faðir og móðir fóru til Króatíu í nótt þannig að ég er einn heima með bróðernunum. Missi af bústaðarferð um helgina því að móðir mín vill að einhver sé örverpinu innan handar. Skil ekki alveg þá afstöðu, drengurinn virðist langbestur okkar í því að komast af í svona aðstæðum. Seinast þegar við vorum einir heima bræðurnir(þá voru það tvær vikur) tók hann t.d. að sér að þvo af okkur. Þvílík voru lætin í drengnum að maður var nánast rifin úr fötunum til þess að hann hefði eitthvað að þvo.

Pæling. Nú er Noregur óneitanlega tengdur Íslandi og mikill samgangur á milli landanna. Ef að nafn og staða manns sem veikist af hermannaveiki á Ítalíu er fréttaefni að mati DV af hverju eru þá nöfn og stöður fólks sem veikist af henni í Noregu ekki fréttaefni? Norðmenn sjálfir reyndar virðast ekki telja þetta mikið fréttaefni sjálfir, ekki einu sinni þeirra DV-fjölmiðlar hafa gengið svona langt.

Það sorglegasta við þetta allt saman að mínu mati er það að Róbert Marshall, skeleggur formaður Blaðamannafélags Íslands leggur sig fram um að verja þetta á spjallsvæði press.is.
Það er merkilegt spjallsvæði. Af orðum DV manna þar þá eru þeir að veita almenningi á Íslandi gríðarlega mikilvæga þjónustu með starfi sínu, en þegar sami almenningur tjáir sig þar þá er hann orðinn að kverúlöntum og málefna.com liði.
Magnaður andskoti.